عم (بطاطا)

يــــاريت تقروا القـــصة دي وتقـــولولي رأيـــكم


وعلي فــكرة القــصة منقــولة لــكن بتعــبر عن حــاجات كتـــير فى بـــلدنــا



عـــم بطـــاطــــا




لما رجعت من الخارج بعد غربة سنين طويلة. وانا فى بيتنا القديم فى حارتنا القديمة.

قلت أروح أسلم على عم بطاطا الحلاق,

أصله واحشنى جدا وبالمرة أحلق شعرى, وفضلت أفكره بنفسى ,

ولقيت عم بطاطا الراجل الطيب المسالم مش عايز يفتكر أى حاجة ,

يمكن عشان مايتحسرش على أيام زمان , أيام الخير,

لما كان العيش بيفيض فى الأفران ولما يبات العيش فى الفرن يقوم الفران يبيعه للجيران

بالتورة ( التورة=4 أرغفة). والناس كانت بتاخد العيش البايت علشان تأكله للفراخ والبط

. من حق عم بطاطا إنه يرفض يفتكر أوحتى يجهد الذاكرة,

كتّر خيره عم بطاطا عمره الآن فوق ال75 سنة



. الآن مافيش عيش للبنى آدمين و أنفلوانزا الطيور مش سايبة فراخ ولا بط ولا إنسان. ما علينا ..


سألت عم بطاطا أخبارك إيه وأخبارالبلد إيه ؟؟

عم بطاطا بص لى وسكت

. لكن عيناه المطلتان من بين التجاعيد التى تملأ وجهه تعبران عن كل مايريد أن يقول وما لا يريد أن يقول .

سألته , إيه ياعم بطاطا ؟ مش عايز تتكلم ليه . إنت خايف أكون أمن دولة وللا إيه ؟

, ضحك عم بطاطا وقال لأ أنا عارفك

, إنت المصرى إبن محدود الدخل أفندى .

فاكر ياواد يا مصرى لما كنت بتحلق عندى شكك ؟

قلت له فاكر ياعم بطاطا بس أنا المره دى جايب معايا فلوس والله .


وسألته صحيح يا عم بطاطا الثوره يوم 6 أبريل وللا دى كدبة أبريل ؟

رد عم بطاطا وقال ثورة إيه يابنى دا حنا شعب هجاص وماعادش فيه ثورات خلاص

. طول ما البانجو موجود ولادنا هيفضلوا يموتوا ع الحدود واحنا زى الولايا نلطم الخدود.

طول ماالشباب شهران أدام الدش بيشوف ....... هانفضل جبناء لا نهش ولا ننش

. طول ما البلد فيها كاباريهات و نانسى عجرم وهيفاء وهبى يبقى ع البلد السلامة ولا تحزن ياقلبى

. خلاص زمن الثورات ولّى وخد الجدعان وما خلّى .

وسألته هى اخر ثورة كانت سنة كام وكان سببها إيه ياعم بطاطا ؟

عم بطاطا قال كان ياما كان


, كان فيه حكومة مفترية ومستقوية بتحكم شعب غلبان تعبان شقيان كفران جوعان ومش عايز أقول كمان
( جبان )


. الحكومة ترفع سعر البنزين , الشعب ساكت ,

ترفع سعر المواد الغذائية الأساسية و الشعب ساكت,

الحكومة ترفع الأسعار تانى وتالت ورابع وخامس خلال شهر والشعب ولا له اى دعوة

, لغاية لما الحكومة زهقت من الشعب اللى لا بيهش ولا بينش ,

قامت الحكومة أصدرت قرار بإن كل واحد رايح شغله الصبح ياخد على أفاه ,

وطبعا تم تطويق جميع مداخل ومخارج البلد

ومداخل الكبارى و مترو الأنفاق بالضباط والمخبرين وضرب الإفيان إشتغل يامعلم .

وطبعا الشعب المصرى محترف فى التزويغ من الشوارع الجانبية والحوارى

وفعلا بعض الناس زوّغوا , لكن الحكومة طبعا صاحية ,وكانت حاطة دفاتر الحضور والإنصراف مع الأكمنة ( جمع كمين ) وبالكمبيوتر والرقم القومى

, واللي ينضرب يتعلم على إسمه فى الكمبيوتر

( الظاهر إن هى دى الحكومة الذكية ).

وطبعا المفاجأة كانت اخر الشهر إن الناس اللى زوّغوا وما انضربوش بالأفا

, إتخصم من مرتباتهم. مش ده المهم,المهم إن الناس كانت بتتأخر وبتتضايق من الزحام فى طوابير ضرب الأفا .


فقامت مظاهرات عنيفة عمّت جميع أنحاء البلد .

وكان المطلب الأساسى والوحيد هو زيادة عدد المخبرين اللى بيضربوا بالأفا عشان ننضرب بسرعة ونخلص ونروح مصالحنا .


يـــهمني رأيكم بجد ....

حد عاوز حاجة من ابو زعبل بقا